Shettyhalli, Sidlaghatta : ಶಿಡ್ಲಘಟ್ಟ ತಾಲ್ಲೂಕಿನ ಶೆಟ್ಟಹಳ್ಳಿ ಗ್ರಾಮದ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ಬುಧವಾರ ಉಚಿತ ಆರೋಗ್ಯ ತಪಾಸಣೆ ಶಿಬಿರವನ್ನು ಸಂಯೋಜಿಸಲಾಯಿತು.
ಕಾರ್ಯಕ್ರಮವನ್ನು ಉದ್ಘಾಟಿಸಿದ ನಿವೃತ್ತ ಉಪನ್ಯಾಸಕ ದೇವಕೃಷ್ಣಪ್ಪ ಮಾತನಾಡುತ್ತಾ, “34 ವರ್ಷಗಳ ಶಿಕ್ಷಣ ಸೇವೆಯ ಬಳಿಕ, ನಿವೃತ್ತ ಜೀವನದಲ್ಲಿ ವಯೋವೃದ್ಧರು ಹಾಗೂ ಗ್ರಾಮಸ್ಥರ ಆರೋಗ್ಯದತ್ತ ಗಮನ ಹರಿಸುವ ಸಂಕಲ್ಪದಿಂದ ಈ ಶಿಬಿರ ಹಮ್ಮಿಕೊಂಡಿದ್ದೇನೆ,” ಎಂದು ತಿಳಿಸಿದರು.
ಅಬ್ಲೂಡು ಗ್ರಾಮ ಪಂಚಾಯತಿ ಹಾಗೂ ಕೋಲಾರದ ಜಾಲಪ್ಪ ಆಸ್ಪತ್ರೆಯ ಸಹಕಾರದೊಂದಿಗೆ ಆಯೋಜಿಸಲಾದ ಶಿಬಿರದಲ್ಲಿ ಹೃದಯ, ಸ್ತ್ರೀರೋಗ, ಚರ್ಮ ಹಾಗೂ ಕಿಡ್ನಿ ತಜ್ಞರು ಸೇರಿದಂತೆ ನುರಿತ ವೈದ್ಯರ ತಂಡ ಭಾಗವಹಿಸಿತು. ಬಿಪಿ, ಶುಗರ್, ಈಸಿಜಿ, ಎಂಡೋಸ್ಕೋಪಿ ಪರೀಕ್ಷೆಗಳು ನಡೆಸಲ್ಪಟ್ಟುವು. ಆರೋಗ್ಯ ತಪಾಸಣೆಯೊಂದಿಗೆ ಉಚಿತ ಔಷಧಿ ಮತ್ತು ಊಟ ವ್ಯವಸ್ಥೆಗೂ ಅವಕಾಶ ಕಲ್ಪಿಸಲಾಗಿತ್ತು.
ರೈತ ಸಂಘದ ತಾಲೂಕು ಅಧ್ಯಕ್ಷ ರವಿ ಪ್ರಕಾಶ್ ಮಾತನಾಡಿ, “ಇಂತಹ ಶಿಬಿರಗಳು ಗ್ರಾಮೀಣ ಭಾಗದ ಜನತೆಗೆ ಬಹುಮುಖ್ಯ ಸಹಕಾರಿಯಾಗುತ್ತವೆ,” ಎಂದು ಅಭಿಪ್ರಾಯಪಟ್ಟರು.
ಶಿಬಿರದಲ್ಲಿ ಶೆಟ್ಟಹಳ್ಳಿ ಹಾಗೂ ಸುತ್ತಮುತ್ತಲಿನ ಗ್ರಾಮಗಳಿಂದ 150 ಕ್ಕೂ ಹೆಚ್ಚು ಜನರು ಭಾಗವಹಿಸಿದರು. ವಯೋವೃದ್ಧರು ಮತ್ತು ತುರ್ತು ಚಿಕಿತ್ಸೆ ಅಗತ್ಯವಿರುವವರಿಗೆ ಈ ಕಾರ್ಯಕ್ರಮ ವಿಶಿಷ್ಟ ನೆರವಾಯಿತು. ವೈದ್ಯರ ಮಾರ್ಗದರ್ಶನದಿಂದ ಜನರು ತಪಾಸಣೆ ಹಾಗೂ ಸಲಹೆಗಳ ಲಾಭ ಪಡೆದರು.
ಗ್ರಾಮಸ್ಥರ ಚುರುಕಾದ ಸಹಭಾಗಿತ್ವದೊಂದಿಗೆ ಶಿಬಿರ ಯಶಸ್ವಿಯಾಗಿ ನಡೆಸಲಾಯಿತು. ಈ ವೇಳೆ ಪಿಡಿಒ ಅಶೋಕ್, ಎಂ.ಎನ್. ದೇವರಾಜ್, ಶಶಿಕುಮಾರ್, ಉಪನ್ಯಾಸಕ ಹರೀಶ್, ಮಂಜುನಾಥ್, ಬತ್ಯಪ್ಪ, ವೆಂಕಟೇಶ್, ನಾಗೇಶ್, ಮಲ್ಲಹಳ್ಳಿ ಬ್ಯಾಟಪ್ಪ ಹಾಗೂ ಶೆಟ್ಟಹಳ್ಳಿ ಮಂಜುನಾಥ್ ಉಪಸ್ಥಿತರಿದ್ದರು.
